راية عقيد

لـ عيد الشلوي، ، في غير مُحدد

راية عقيد - عيد الشلوي

يا هاجسي عطني من الأفكار ما لذ و طاب
مثايلٍ يطرب لها بين القريب و البعيد

انته على عد الروى ما انت بورى طرد السراب
اجمل و جملني ترى الأفكار للعراف صيد

مرات صوتي ما تجاوب له و مراتٍ مجاب
و انا دعيتك دعوة المحتاج و المعنى فريد

و انا ليا منه لفاني وافدك عقب الغياب
كنك تبشرني بعد غيبتك بالعيد السعيد

اليا نخيتك لا تكل و لا تذل و لا تهاب
ابيك تشرح لي عن اهل العز و المجد التليد

ربعي لهم حقٍ علي و مجدهم ثقل الهضاب
و إنما ذكرت امجادهم مالي لزومٍ بالقصيد

سربة ذيابٍ تتبع الآثار عن سربة ذياب
امجادهم ما تنجحد و الساس ثابت من حديد

قومٍ ليا حمي الوطيس و قالوا إن الملح ذاب
ففعالهم ماش اختلاف و باسهم باسٍ شديد

ربعي هل الردات و الفزعات سمحين الجناب
زبن الدخيل اللي يشيل الخوف في حبل الوريد

سموى الشلاوى اللي إلى القمه يحثون الركاب
على الجدود الأوله قومٍ يسمون الحفيد

و اليوم حنا في محل الشيخ حلال الصعاب
شيخٍ يحل المعضلات بحكمة الراي السديد

طيب النبا يكفيك عن زادٍ و يكفي عن شراب
و انا اشهد إنه للوجيه الغانمة مكسب و فيد

سعد ولد دوخي سليل المجد غيث من سحاب
امجاد ابوه و مجد جدانه تسجل له رصيد

حفيد من يروي سنان السيف مصقول النصاب
على ظهور الصافنات اللي يضدن الضديد

ابن حريش اللي يميل الشعر في مدحه و طاب
عقيد قومٍ يتبعه فرسان في راية عقيد

© 2024 - موقع الشعر