خسارة

لـ سلطان القنيدي، ، في غير مصنف، آخر تحديث

خسارة - سلطان القنيدي

البارحة كنّي على الأرض مقتول
من زلةٍ فيها النكد والمرارة

جتني من اغلى انسان مدري وش اقول
خسارةٍ ما بعدها من خسارة

كنت اذخره واظن يصفي على طول
ما كنت احسب الوقت فيه استدارة

حتى عرفته زين والحين مذهول
وقت انهزامي صار وقت انتصارة

يا شينها لا صرت بانسان مأمول
وتلقاه يحذف في طريقك حجارة

والحسد دايم من وقع فيه معلول
أخطر مرض بالجسم دون انهيارة

وما دام هذا الدرب واضح و مدلول
أمشي مساري واتركه في مسارة

عرفت بأن الطيب لو ضاع ما يزول
وعرفت مطلاع الجبل وانحدارة

وش لي بديرة كلها محول بمحول
ولا بها ما يستحق البشارة

وين الربيع اللي على داير الحول
وألقاه يوم انّي لفيته زيارة

والبارحة بالليل مدري وش اقول
خسارةٍ ما بعدها من خسارة

© 2024 - موقع الشعر