تحت التجربه

ودّي اسوي قصيده و يسمعها الحبيب
واحدٍ بيني و بينه تضيع الذبذبه

راحت الفرصه ولا عاد يمديني خطيب
والله اعلم بالخساره و يعلم مكسبه

يمكن انه ما رضى وان رضا فامره عجيب
قلبي اللّي عذّبه ما جرا وش يطلبه

والوكاد الموت هذا هو و هذا النصيب
مالها حتّى علاجات تحت التجربه

كل ما غنيت لاجله تناولها غريب
و جاء يعلمني عجل يعني انّه منتبه

ما هذاه بعلم يا ناس والراي المصيب
من تعرّض شي ماهوب له لا يشتبه

فرق بين العلم و الحلم للعقل اللبيب
ماني بفاضي و اجاهد عبادٍ معجبه

صاحبي ما شفت زينه بعيد ولا قريب
جل من خلاّه ماله مع العالم شبه

يتبجح من حلاياه فالحفل المهيب
و الله ما احدٍ مشرّهٍ به ولا احدٍ يقربه

و العرب في ظنهم نور بيته زود طيب
في نهار و ليل دايم ما يطفي كهربه

ما دروا ما غير خدّه ونوره ما يغيب
و العجب يبطل ليا عرفوا الناس سببه

و ان بغيت اوصّل الوصف شرهات الرقيب
كن ردفه لا قفاه الهوا ردف عزبه