أميرة قصر

عرفت في غيبتك معناة ( ذل السؤال )
سؤالي النّاس عنك و ردّهم مختصر

وش دخّلك في فلانه خل عنك الهبال
هم ما يعرفون من عاداتي انّي مصر

اخذ علوم الصغار اللّي عن الاحتفال
يا حليلهم يحسبون انّك أميرة قصر

لا سولفوا عن تفاصيلك يروح الخيال
للسهره اللّي بدايتها يميل الخصر

و الله اعرف انّها عادي ما فيها انحلال
لكن على لذّتك قلب العناء ينعصر

خذك القدر من هنا و انا خذتني الليال
للحزن و دموعي و لاشياء ما تنحصر

ما كنت ابي شي يجمعنا بغير الحلال
انا اول محب عن حبّه يغض البصر

للحين احبك و احب الخير لك لو يقال
الانتقام افضل من اي شي حتّى النصر

تدرين ؟ حتّى الشعر ينقاد لك لا يزال
قصايد اجيبها وانا اتقهوى العصر