تغيب عن بعض القلوب البصيره

لـ محمد العواد، ، في غير مصنف، آخر تحديث

تغيب عن بعض القلوب البصيره - محمد العواد

يا الادمي محدن يهينك ويجرحْك
يا ابعدت عن شر المغفّل وخيره
ما كل خلق الله تقبّل نصايحْك
تغيب عن بعض القلوب البصيره
ترى الهديفه عند الاجناب يفضحْك
خبلٍ ترفّع به خباث العشيره
ياكثر من ياصرت حاضر يميدحْك
ويا اقفيت بعقوبك يشبّ الذخيره
ويا احتجت مايسعى لصالح مصالحْك
يمناه عن نيل المكارم قصيره
عليك باللي يا استشرته يصارحْك
رجلٍ نصوح وبه شهامه وغِيِره
واطلب رضى الله ياعسى الله يسامحْك
دنياك ما هي باهتمامك جديره
تشوف ما يحزنْك فيها ويفرحْك
والادمي لازم يواجه مصيره
تر حكمة الله مقتضاها لصالحْك
ما قدّره رب المخاليق خيره
© 2024 - موقع الشعر