من غاب عن عيني تغيّب عن البال - عبدالعزيز المشعل

من غاب عن عيني تغَيّب عن البال
إلا الذي في وسط قلبي قراره

أواصله واحس وانشد عن الحال
ما يبتعد لو كان تبعد دياره

متعايش(ن) وياي من طيبة الفال
على المعزه والنقا والنعاره

يجبرني اتبسم على كل الاحوال
إليا طرى طفّا عليّ الحراره

اصيل ووافي وعشرته مالها امثال
ياحي ابو جده وياحي داره

هذاك منّي وافهموها ياعذال
اشفق على شوفه واسوق البشاره

ماينقطع عن قلب الاحباب الارسال
دام الشعور يبث فيه الاشاره

تمر عليّ الناس بالوان واشكال
والذيب ما تمشي عليه العياره

الصدق قل وخايب الساس يحتال
والهافي البلاس زيّن شعاره

اعوذ بالله من خبيثات الاعمال
يالي تدس السم وسط الغضاره

لا تحسب إنا من فعايلك جهال
حنا لكم صاحين في كل غاره

ولاخاب ظني قلت عادي يارجّال
يالله عساها خير ماهي خساره

صبرت وصبري بلسم اجراح واجلال
وصليت لله ركعتين استخاره

يالله تنزلني على خير منزال
وتكفيني وجيه النكد والقشاره

تبقى لي ياراس الوفا ترث الابطال
رابي على حد الطنخ والسطاره

راع الوفا لاميّل الوقت ما مال
ما تنطفي مع شدة الريح ناره

وراع الوفا ما يهزمه كيد الانذال
يبقى عزيز(ن) فوق راس المناره

ويالي تغيب وما تغيّب عن البال
انشهد انك تستحق الصداره

شفي اشوفك يا شفا قلب رحال
غريب بالدنيا ويعدك دياره

تعليقات الزوار

  • كُل المحتوي و التعليقات المنشورة تعبر عن رأي كتّابها ولا تعبر بالضرورة عن رأي موقع الشعر.
  • بعض صور الشعراء و الشاعرات غير صحيحة، نرجو تبليغنا إن واجهت هذى المشكلة
  • إدارة موقع الشعر لا تتابع التعليقات المنشورة او تقوم بالرد عليها إلى نادراً.
  • للتواصل مع ادارة موقع الشعر إضغط هنا.
© 2020 - موقع الشعر