سادن دير - شائم الهمزاني

أنا يا صاحبي لي بالمواقف صخرة التسخير
وكل اللي ، على بالك.. إذا يلزمْك ، عندي لك

مثالك ، ما يمثلني ..أنا عندي مثالي ، غير
ولو قلت: أتكبر ، عز ذاتي قال : يا حليلك!

ترا الماء لا صفى لك تنخدع في عمق جم البير
بأقول : اللي على بالي..وإن اعتذرت (كلي لك)

أنا حب التواضع طبع فيني وأكره التشهير
ولو حللت ، لو مهما تحلل خاب تحليلك

أنا يا صاحبي بي وازع راهب وسادن دير
ولاني ، أبدا معاك في تقويل أقاويلك

تأول ، ما تأول في خيال الوهم والتحوير
أنا لا هنت في حالي وعيش انته بتأويلك

أكيد إنك تصورلك مشاهد بين شر وخير
جزاك الخير عن خيرك واما الشر ، يا ويلك

تقول ، اللي تقول براجمات الهدم والتصغير
أنا شأني بشأن الله عالي عن تماثيلك

ولك عقلك واسلوبك تعيش بقمة التطوير
ولي عقلي واسلوبي ولا انته لي ولاني لك

© 2024 - موقع الشعر