طلّة حشيم - خالد المخيدش

هلْهلْ الصبح مثل أرحب بوجه الحشيم
كل خطوه ! سلام ، وكل نسمه ! هلا

وأقبل النور يطرد بغضْ ليلٍ بهيم
شلفته تلهز متون الظلام وجلى

وإسّتباحة يدين الشمس ركنٍ عتيم
إسّتباحة زكاة المال ! مال بْخلا

في ضلوعٍ تساقى جنّته من حميم
لين ذوّا ورقْها وأنحنى ما علا

غرّد الطير فوق الغصن لو هو هشيم
كنّه يقول : ( عِيش العمْر ولّا فلا )

كل جرحٍ ! يبي يبرى ولو هو قديم
وكل حلوٍ ! يبي يفنى لو إنه حلا

ياحطام الضلوع اللي بصدري تقيم
إنفضي كل عشٍ مكْتسيه البلا

وغرّدي ياطيور الضايق المستهيم
إصدحي في منابر خاطرٍ ماسلا

وإعزفي للأماني مع هبوب النسيم
حلو الألحان وإكسيها ورود وغلا

عقب طلّة صباحٍ مثل طلّة حشيم
بالخطاوي سلام ، وبالمحيّا هلا

تعليقات الزوار

  • كُل المحتوي و التعليقات المنشورة تعبر عن رأي كتّابها ولا تعبر بالضرورة عن رأي موقع الشعر.
  • بعض صور الشعراء و الشاعرات غير صحيحة، نرجو تبليغنا إن واجهت هذى المشكلة
  • إدارة موقع الشعر لا تتابع التعليقات المنشورة او تقوم بالرد عليها إلاّ نادراً.
  • للتواصل مع ادارة موقع الشعر إضغط هنا.
© 2021 - موقع الشعر