الضيغمي نوّاف

من دار ابن ثاني اليا دار الكويت
عد الخطى وإعداد من يمشي بها

يامرحبا وألف ٍ هلا عن كل بيت
وعن كل شبّان الكويت وشيبها

بالضيغمي نواف يوم إنك لفيت
تقولها شمّر وأنا أغني بها

ياأمير جيت ومرحبا من يوم جيت
غلبا تْحيّي بك وأنا أحيّي بها

بقلوبنا قبل المساكن لك مبيت
والشاردات نعنّها ونجيبها

في رأسك اللي للجمايل يستميت
من دون ربعك وقفتك تحري بها

سلْم ٍ لأهلك ولا عن السلْم إنتحيت
لأخوان نوره جرّة ٍ تمشي بها

حطّت لهم بكتابة الأمجاد صيت
لو زوّر الكتّاب .. ياقاري بها

ياترثة اليتمان .. وأنعم لا بِليت
مكاسر العنبر وفاخر طيبها

دونك سناعيس وطنايا لاأنتخيت
وأهل اللحيسا محزم ٍ لاأنخي بها

من طيب أبوك وطيب رأسك ماأنثنيت
والساق دون اللي تبي تثني بها

فقيد شمّر حيّ .. منهو قال ميت !
برسومك الجينات مانخطي بها

أشوف بك ماقف طلال إليا أنبريت
للفعل .. وفْعول الرجال تْثيبها

سمح القبال .. تْطهّر الماء لا حكيت
عدٍّ روى منها الأدب شرّيبها

فإن سانعت ! يالين بأسك يارضيت
وإن مانعت ! صمّ الجبال تْذيبها

وأنا بمدحك ماأنجبرت ولا سعيت
ألّا غلا وأرواحنا نصخي بها

ماني بقصّاد ٍ يدوّر ماعطيت
مدّاحة جيوب العرب مالي بها

ياأبن رشيد ولو كتبت ألفين بيت
ورصّعتها بألماسها وذْهيبها

في مدحكم ..والله وبالله ماوفيت
فعايلٍ كل العرب تدري بها

يكفيك عن قولي غلا شعب الكويت
وينبيك عن حب العرب ترحيبها