بين حشيم العضياني وسعيد بن عوّاد الذيابي

ياهل الجمس الحمر أخذوا كتابي
كان ناصين الرياض توصلونه

وصّلو من شاعر ٍ يقدا الجوابي
عن مناقيد العرب شعره يصونه

وصّلوا خطّي عريبين النسابي
بيت بن عوّاد ملزوما ً تجونه

أنصوا اللي فاللوازم مايهابي
فالرياض الشهم بيته يعرفونه

مثل بهّاج الضمية بالشرابي
مانقص جمّه من اللي ياردونه

تنشر البيضا على وجه الذيابي
يكتسي ثوبا ً طويلات ردونه

جده المذكور ماهاب الصعابي
احتزم دون الدخيل وحال دونه

***
رد سعيد بن عواد الذيابي :-

مرحبا بكتاب متعبت الركابي
ربعنا اللي كل درب ٍ ينهمونه

ناصرين الجار مروين الحرابي
دينهم في وقت حلّه يقتضونه

مسقية لاخصامهم مر الشرابي
خصمهم لو ماوصلهم ياصلونه

مكرمين الضيف صافين الجنابي
الجمال اللي ثقلهم يحملونه

من لفا برباعهم فالكيف طابي
ينشرح صدره ويدله عن حزونه

هم رجال العرف في درب الصوابي
حوضنا اللي فالمشاكل ياردونه

الصقور اللي مواكرها الهضابي
ماكر دايم جويدات حصونه

ياحشيم الوقت منه الراس شابي
شيّب الرجال ماخلّص ديونه

فيه صار الرجل عن خصمه يهابي
ماجداه ألاّ يقرض في سنونه

قبل ماعمهوج يجندل فالرقابي
ماطمع في حدهم من شال شونه

يالله المعبود ياجازي الثوابي
تنصر الاسلام واللي ينصرونه

تنصر آل سعود في قضب النصابي
سيفنا اللي مايجوز العلم دونه