عالم ملون

عالم ملوّن ممتلي بالزخاريف
حقيقته صارت ملامح خيالي
 
ماعاد له اسماً ولا له تواصيف
ياصورته صارت بليا جمالي
 
واللي بقى منه شوية تلاصيف
واصبح به المضمون اجوف وخالي
 
لاياخساره ثم بقول ياحيف
ثوابتاً صارت بدرب الزوالي
 
الصدق فيه اصبح مجرد سواليف
اوهام للماضي وماله توالي
 
والكذب له اسماً وكل التعاريف
طريق ويوصلك لاهل المعالي
 
تزوير للمفهوم وللاصل تحريف
وقصور تبنى على طعس الرمالي
 
والحق بالتوصيف منه مخاويف
قالوا ترى راعيه ماهو مثالي
 
حتى الصراحه باهضه بالتكاليف
ان كان ماقالوا ترى به اهبالي
 
وابطال هذا الوقت شلة ملاقيف
وياكثر منهم مدعي بالكمالي
 
وصغيرهم خريج دار الخواطيف
يلعب على الحبلين وماهو مبالي
 
دنيا وانا اشهد ماعليها تحاسيف
من غير مانسمع ترى فلان فالي
 
وياماحلا المرقاب بذيك المشاريف
هو الدواء للحال واللي جرى لي
 
واعيش لحظه واتذكر مواليف
رغم انهم عالدوم سكان بالي
 
ذكرى وهمساً ثم شوق الملاهيف
بيني وبين اللي بحبه صفى لي
 
ياحبهم بين الجوانح ولا عيف
اعيش لاجله حيث هو راس مالي
 
واقوله شفت الذي قبل ماشيف
واعلمه باللي تغير بحالي
 
عواد الهران