دروب الجفا

تغيب وتجيبك هجوس وطواريق
وأشتاق لك ياليل عمري وبدره

عليك يا حادي زماني على الضيق
يامترفٍ عينك من التيه خدره

قلبٍ تولع بك قليل التوافيق
لو يقترب ماله على الوصل قدره

ولو إن قلبي ما تمسه معاليق
إن كان طاح وطيَح الهم صدره

لاهب لك طاري روى يابس الريق
وأورق حشاي ومالت غصون سدره

ياللي لك وجيه القصايد مطاليق
ولك الوفا لو طوَل الوقت غدره

شفت السحاب اللي بروس الشواهيق
باكر تشوف أعز مافيه حدره

الحر ما قد عذربته المساييق
ولا حط من شاله على الكف قدره

ومن دوَر دروب الجفا والتفاريق
ضيَع غلاه وهدَم الصمت جدره

تمت الإضافه بواسطة : سالم الفروان