ساحلي

لـ زعل الرشيدي، ، في غير مُحدد

ساحلي - زعل الرشيدي

كل ماجيت ابتعد عن بحرك بساحلي
طاشت أمواجك على ساحلي بهمومها

وجيتني في كل حيلك تقل ترتاح لي
وأنت تغرق ليلة اللي يبيك ويومها

وكل ماجيت ادله شوي طيفك لا ح لي
وسج بي في ساعةٍ ماقدرت أقومها

صاحبي ياليت قلبك بسده باح لي
والعيون تعلم اللي خذت بعلومها

وليت نوك كل ماخلت برقه طاح لي
والعروق الضاميه علها ديمومها

صاحبي وأن شفت جسمي هزيل وناحلي
لايغرك والرجاجيل ستر هدومها

راوي ٍ حبك من الراس حتى كاحلي
وصاينك صونة هل المرجله لسلومها

مانسيتك وأن تناسيت عطرك فاح لي
كيف أجل طرياك لافاح لي يشمومها

ياعسى باقي بعمري كثر ماراح لي
والليال المقبله سر قبل قدومها

وياعسى ما أنزاح عني وأبي ينزاح لي
والسهر ينسى عيوني وتذكر نومها

كل بحر ٍمثل بحرك مرده ساحلي
وكل نفس ٍمايجيها سوى مقسومها

تعليقات الزوار

  • كُل المحتوي و التعليقات المنشورة تعبر عن رأي كتّابها ولا تعبر بالضرورة عن رأي موقع الشعر.
  • التعليقات المنشورة غير متابعة من قبل الإدارة. للتواصل معنا اضغط هنا.
© 2022 - موقع الشعر