ابرق يااللي رفيفك بوح وهروج
بطراف غيم ٍ سرى به طول ليله
نوضك يشقّ الظلام ويطوي فجوج
ويبلّ كبد السنين اللي محيله
عالي ولك في سماك أحلام وبروج
غالي ولك فالعيون أكبر قبيله
ساري وكنّك من الأيام مزعوج
يشكي لك الليل هم وتشتكي له
بوحك أحسّه بقلب ٍ من ورى العوج
وأمدّ له كل شوفي يوم أخيله
لقيت ضحكي وحزني فيك ممزوج
وخايلت فيك الدروب المستحيله
البارحه معك قلبي كنّه الموج
يصفق حنايا الضلوع اللي تشيله
نقضت جرح الزمان وحبّ عمهوج
وبيّحت سدّي وأنا راعي طويله
مالي على اللي مضا غايات وسروج
أنكفت يوم أنكف اللي غاب خيله
من لاشلع ضرسه اللي صار ملجوج
ما أرتاح لو شدّ طول العمر حيله
يابرق لون الشفق بيّن كما الروج
بشفاه بنت ٍ مواريها جميله
لو طوّل البوح ذوّب بالحشا ثلوج
وحرّك نسيم الهوى غصن الخميله

تعليقات الزوار

  • كُل المحتوي و التعليقات المنشورة تعبر عن رأي كتّابها ولا تعبر بالضرورة عن رأي موقع الشعر.
  • بعض صور الشعراء و الشاعرات غير صحيحة، نرجو تبليغنا إن واجهت هذى المشكلة
  • إدارة موقع الشعر لا تتابع التعليقات المنشورة او تقوم بالرد عليها إلى نادراً.
  • لتواصل مع ادارة موقع الشعر إضغط هنا.
© 2019 - موقع الشعر - بواسطة شركة المبرمجين