ابيك .!!

ابيك ....!!! كلمه لو تحسين فيها.
ماكان صديتي ولا صرت محتاج.!!

ابيك ...!!!! فاح الود فيها و فيها.
فاقد شعورٍ .. للحزن طب وعلاج.!!

ظلمة غيابك ... حسبي الله عليها.
عانيت منها ...! مالها نور وهاج.!!

اما تجين الروح ... والاّ احتريها.
تجيك لو سبّب لها الود الاحراج.!!

يانور عيني.! شوفتك جيت ابيها.
والاّ سجينك ينتظر منك الافراج.!!

بنيت لك دوله ...! وقلت اسكنيها.
وجيتي تهدمين المباني والابراج.!!

( ابيك ) جاتك .! لكن اللي يليها.
بيتٍ سقاه الفكر من عد هداج.!!

كانك قفا .! ذكراك عني خذيها.
ماعاد نحتاجك لو القلب يحتاج.!!

(لا صد صالح ) جملته حلليها.
ماعاد يرجع لو سقيتيه الازعاج.!!