بذور القطاعه.!!

السقوط ... اللي تمناه الجماعه.
بيّن اوجيهٍ ......... ولمّح عن وجيه.!!

يحسبون السب بغيابي شجاعه.
وفي حضوري ينكتم رجل وسفيه.!!

المسبه ... في سوالفهم بضاعه.
بين بايع حرف ...... والاّ مشتريه.!!

هرجهم بالناس يطربهم سماعه.
والنصيحه عندهم .... عطرٍ كريه.!!

زارعين الشر .... وبذور القطاعه.
محرمين الناس ..... وصلٍ تحتريه.!!

طبعنا مافيه شذب ... ولا لكاعه.
تربية عودٍ ......... يصوَّت له نزيه.!!

المجالس لو حضرنا في مجاعه.
نمنع الهرّاج ...... لا ياكل اخيه.!!

ان تكلمنا ... يجي بالرَجل راعه.
وان سكتنا.! نظرتي تقضي عليه.!!

هيبةٍ ........ مزروعةٍ فينا زراعه.
شامخٍ بالعز ....... والقلب النبيه.!!

واللسان اللي تبجّح في طماعه.
نحرقه بالشعر ....... والاّ نشتويه.!!

لا يدوّر للخطا عندي .. شفاعه.
الرجل لا قال قوله ......... يحتميه.!!

كلمةٍ بالوجه ... بعيوني شجاعه.
والسفه في غِيبتي ...... حلٍ وجيه.!!

الرجل من دون هقوه ياضياعه.
تصبح ارجوله ....... تشابها يديه.!!

النصيحه جات من فنّ وبراعه.
واللبيب القرم ......... يفهم مانبيه.!!