غصة

غصة
بقلم
آمال محمود كحيل
 
قوللي عايز تاني إيه ؟!
هوَّه فاضل مني ايه ؟!
قلب بات مجروح وياما
كنت باجي كتير عليه ؟!
قلب داب حسرة ومهانة
بعد ما استهترت بيه ؟!!
قلب عاش
حلمه ف خياله
وانت عاجز تحتويه
كان عليك عاقد آماله
إيه حصد غير الإدانة ؟
ظلم فاق كل احتماله
صعب ع اللي بيقاسيه
عايزُه يقبل يوم خيانة
من حبيب
باع عمره ليه ؟!!!
لا ومقابل إنه ضّحَّى
جيِّ برضه يزيد عليه
حُط نفسك يوم بداله
ترضى باللي
راضيله بيه ؟
ليه بتوئد كل فرحة
لما تلمحها ف عينيه ؟!
آه يا ظالم لو دا قلبك
يستحيل هاتجور عليه !!
 
ليه بتقتل فيَّ حبك .. ؟!
ليه تمللي تقيد في ناري
لاجل تخضع لك مشاعري
ولا تشمت بانكساري ؟!!
لاجل تاخد مني تارك ،،
ولا تغسل بيَّ عارك ؟!
ولا تشفِي بجرحي جرحك
ولا بين أشلاء دماري
تنتفض وتعلِّي صرحك ؟!
موش كفاية تقوللي
شاري
كله باحت بيه ملامحك
قلبي داري
باللي جاري
يكفي بابكي وانت تضحك
يبقى ليه طول انتظاري
النهارده هاخد قراري
كان هواك فلكي ومداري
وف عينيك
كان انتحاري
بس صبري عليك يا جاني
ملِّ مني ، ومن هواني
موش هاطاوع قلبي تاني
مهما في بعادك يعاني
موش هاسيبه بإيد أناني
ولا اعاند فيك زماني
 
وهم عشته ودي النهاية
وانتهت أجمل حكاية
واللي كان اختارها إنت
يعني ذنبك م البداية
واللي غرَّك كنت ساكتة
كنت اسامحك مهما تقسى
سيبني أبعد ، يمكن انسى
رغم اني بجد يائسة
سيبني اداوي جرحي منك
ليه أعيش وف قلبي غصة
ليه أعيش ...
وف قلبي غصة ؟!!!