أنا قادرة من غيرك أكون - آمال محمود كحيل

أنا قادرة من غيرك أكون
بقلم
آمال محمود كحيل
 
أنا مش هاكونلك
ضِلّ ، أو يوم هانحني
للريح ، واخاف
ولا يوم غصوني هاتنتني
ولا يوم هاقوِّس م الجفاف
نهر المشاعر جوه قلبي
ميِّته بتروي الضفاف
وبصبري هاعلا ،
ومهما يغلا المهر فوق
حد الكفاف
أنا قادرة رغم جروحي أبدُر
حلمي لسنيني العِجاف
وامضي ف طريقي اللي ابتديته
ف خط رافض الانحراف
أنا موش هاخلي اليأس يضعِف
همِّتي لو حتى زاد
حمل الكتاف
وبرغم سكينك بيغرز نصله
في ضلوعي الضّعاف
من وسط قاع الجرح هاصلب
عودي تاني وامشي لنهاية المطاف
أنا رافضة ظلمك ليَّه ،
رافضة عينين ملاها الغلِّ ،
رافضة إيدين بتطعن
فيَّه ليل ونهار وقلب بمُوته مات
نبض العفاف
أنا قادرة أبني ، وهامتي توصل
مهما طال عمر الخلاف
لو ترمي ميت مليون حجر
لو ضيِّ قنديلي انتحر
لو جرحي ينزف ،
للنهاية ودمي دا هايروح هدر
صدقني موش
هايكون هدر ،
ولا موتي معناه ارتجاف
لحروفي هايكون ألف نصل
وألف حد ، وألف معنى ،
وألف ميت
مليون حقيقة ف وش ظلمك
ليَّه تصرخ ،
مهما كنت ، ومهما كان
حجم الألم فوق لاحتمال
أنا مش هاكونلك ضلِّ أو يوم
هابقى ليك ، ولا في الخيال
وازاي أعذب روحي بيك ،
أو حتى أرضى تكون شريك
أنا قادرة من غيرك أكون
وان كنت عارف إنت إيه
أهو بكرة تعرف
مين آمال !!!
© 2024 - موقع الشعر