مستني إيه

مستني إيه ... ؟!
بقلم
آمال محمود كحيل
 
أشياء كتير ما عرفتهاش
لكن النهارده عرفتها
وحاجات كتير ما فهمتهاش
دلوقتي بس فهمتها
شفتك خلاص من غير قناع
بعد السنين دي كلها
م القسوة سكنت ليل عينيك
واقدر أقول
حلمي انتهى
قول واعترف إنك هويت
فيه واحدة تانية عشقتها
وخلاص لقيت
غيري البديل
وجريت قوام على عشها
غرتني بدموع الغرام
بإديَّه دول جففتها
وخدعتني بحبة كلام
ووعود كتير صدقتها
ورميت شباكك والسلام
أهي مسرحية وعشتها
انهي اللي بينا بالوداع
في عينيك حقيقتك كلها
أرجوك كفاية
بلاش خداع
متقولشي موش بتحبها
حاسس تمللي بالضياع
قلبك معاها ، وملكها
الحب بيننا خلاص
ما ضاع
وأكيد هاتنسى ف قربها
ماهي هيه ليك
بر الأمان
والخطوة رسيت عندها
حضن الدفا ونبع الحنان
وشغَل عيونك سحرها
أنا أبقى إيه ... !
غير ماضي كان
ولا أبقى إيه غير ضلها
صدقني موش
باعتب عليك
مشكلتي وحدي هاحلها
من غير كلام ابعد قوام
مستني إيه ؟
ما تروحلها !