دموع من دم - آمال محمود كحيل

دموع من دم
بقلم
آمال محمود كحيل
 
دموع من دم .. !
وصرخة قلب فاض به الهم !
ومين داري ؟!
ومين شاعر ؟
ومين يعنيه ؟ ومين مهتم ؟
خلاص ماتت قلوب الناس
مفيش نخوة ،
مفيش إحساس
ومهما ننادي بننادي
في صم وبكم ... !!!!
بتطربهم ... مآسينا
وبيتاجروا بمشاعرنا
ومين يسمع شكاوينا
ومين م الفتنة دي يجيرنا
ديابة ف غابة ما بتتلم ؟؟!
 
ما عادش حروف
تواسينا
ولا دموع رحمة تبكينا
ولا إيدين حانية تنجدنا
وحالنا الحالي بات بيغم
تيجان وعروش
كساها العار
مدن بادت وليل ونهار
وحوش دايرة
تقيد في النار
ومين يطفي الحريق ويطُمّ
حروب ودمار
ألم ، ومرار
وقتل ودك ، وحرق وهدم
 
ضحايا ف كل واد أشلاء
وأرطال لحم متقطع
وأكوام عضم
جحيم بقت الحياة والكون
ما فيهشي أمان
وكرب ف كرب
قولولي ازاي يموت الحب ؟
ومين جرع قلوبنا السم ؟؟!
وليه انهار
ناموس العدل ،
وليه سادت شريعة الظلم ؟
وليه استمرأنا عيشة الذل
وليه حكِّمنا
فينا الغرب ؟!
رفعت إيديَّه ليك يا رب
وفي عينيَّه دموع من دم
© 2024 - موقع الشعر