كنز الذهب - سيف الهويملي

الشعر يبقى للرياجيل ديوان
ثوابته لو عروجت مستقيمه

لو بان في قدره من الناس نقصان
من خلف سور قلوب ربعه مقيمه

محبةٍ تبقى على مر الازمان
ماتختلف رغم الضروف الأليمه

وإلا القصايد ذوق بين اذن ولسان
مير انها بقلوب اهلها حشيمه

انا اعتبرها حكمةٍ شانها شان
كنز الذهب عن بيعته فيه قيمه

مادام صار يباع في كل دكان
ماألوم رجل ٍ بالزعل وصل تيمه

هذي حقايق واضحه ياابو فرحان
وانت تعرف الحاضره والقديمه

إليا اعتلى بالجو عسمه ودخان
والجاهل يحسب السماء فيه غيمه

يروح وقته يحتري منه ودان
ويقول هذا به سحابه كريمه

وإن هبّة الهوجاء تزوحه مسيان
من بعدها يعرف العطاء والحريمه

ماني وكيل آدم بتعديل الانسان
وجهة نظر مني عساها سليمه

وانته بماد الشعر شايف لك حصان
لكن ليتك ماتتل الشكيمه

حيث ان لكم تاريخ بالشعر مليان
وأقرب مثل فيها حبيب العريمه

لي الفخر فيكم إليا قلت مزنان
نور بظهوره فج صدر العتيمه

وإسلم سلمت ودمت ياطير حوران
ما أروت ثلاث ايام للقاع.ديمه

© 2024 - موقع الشعر