الجرح بالعين يوجع.!!

ياهاجس الشعر حملي ما تثاقلته.
الصبر كتفي لو ان الحمل ماهمك.!!

قافٍ حبكته ... وطيبته ... وقدمته.
ارقى ياقافي على القمه ولا يهمك.!!

ياقلبي اللي سنين الوقت واسمته.
لو تابس ابحور شعري مايبس يمك.!!

الحقد شفته ... لمع بعيون شايلته.
سهمٍ تعدا ورمحٍ طاح في جمك.!!

لاصار عزوتك ماهم محزمٍ شلته.
ياسهل دربٍ يبيه اللي يبي ذمك.!!

الجرح بالعين يوجع .. لو تصاغرته.
والموت طعنة خويك ... مع ولد عمك.!!

ذي جرحها مايداوى ... لو تغانمته.
يكبر وياكلك بالايام ...... ويسمك.!!

لو تذبح العقرب اللي سمها ذقته.
الله وكيلك (تشيل الداب في كمك).!!

لا تآمن اللي تضاعفته .. وساندته.
نابٍ تحده .. يصب السم في دمك.!!

حتى لو اغضيت عن شوفه وخليته.
الناس بتصيح ترمي بالردى يمك.!!

رضا البشر لو طلبته خبت مانلته.
حتى الرضا لو تناله زاد في غمك.!!

لكن ... لو ضاع عقلك ماتمالكته.
خل الكلام الحلو .... مرساه في فمك.!!