الطيب ماله قبيله

ياهيه .. دورات الليالي طويله
وتشوف فيها ناس .. مختلف الاجناس

اسمعني .. ياراع الفعول الجزيله
اخذ النصيحه حطّها بين الاقواس

خلّ المهايط للنفوس الذليله
ثوب الكِبر .. ماهو للاجواد ملّباس

اللي تواضع .. فالمعالي حصيله
واللي يدوس الناس لابد .. ينداس

اكليب .. لو كل العرب تنحنيله
صارت نهاياته على رمح .. جسّاس

يقطع لسانٍ .. ناطقٍ ( بالرذيله )
يحشم لسانٍ كل كلامه .. بمقياس

لو الفخر عز ؟ الصراحه فضيله
والصدق بعيون الرياجيل .. نوماس

اتقدّر الطيب .. الرجّال الاصيله
وترفع مِقام الخايب .. الناس الانجاس

والطيب بين الناس .. ماله قبيلة
قسّمه يقسّمها الولي بين هالناس

ياكم ولد شيخٍ .. يجيب الفشيله
وياكم رديٍ له .. ولد يرفع الراس !!