ما هو غريب الطيب من راعي الطيب .. - مقبل البلوي

ما هو غريب الطيب من راعي الطيب
ولا هو غريب أهل الردى ينكرونه

الجاحدين أبطال زيف الملاعيب
اللي يدور بروسهم يلعبونه

لطوال وقصار السوالف مناديب
ينقصون الكيل ويزودونه

ما عاد للشرهه عليهم مطاليب
يا ملحقين اللوم لا تلحقونه

نشره علي اللي يعرف إن الردى عيب
والناس لا جت سيرته يمدحونه

وقت الرخاء ولا زمان المصاعيب
يدرى الخوي كنه يداري عيونه

هذاك تحسب له علينا مواجيب
وحنا لنا عليه شرهه ومونه

الذيب ترفع هقوته خوة الذيب
بعيد عن درب الردا والمهونه

من عز نفسه قدروه الأصاحيب
أصحابه اللي بالوفا يعاملونه

يقلط على عز ومعزه وترحيب
وفنجال خولاني يداوي غبونه

وان طاب فاله والصحاري مخاصيب
ساق القدم والله وكيل بشؤونه

© 2024 - موقع الشعر