قهوة الصبح

لـ احمد الردعان، ، في غير مُحدد، آخر تحديث

قهوة الصبح - احمد الردعان

ياقهوة الصبح .. مايغريني فنجالك
عقب غياب الحبيب اللي .. تمنيته

تفوح ريح الغلا .. لافاحت ادلالك
واذوق مُر الجفا لامن .. تقهويته

يالحب الاول تعبت .. اخايل اطلالك
رابع شهر ، والجفا لا ماتعديته

من يوم صوب الموادع .. شدّت ارحالك
والشوق ينشاف في عيني .. لو اخفيته

كنت الامان .. اللي لامن ضاقت الجى لك
واصبحت جرحٍ سكنت القلب ، وادميته

ملّ الصبر من كثر صبري .. بغربالك
جرحت .. قلب الحزن من حزني وابكيته

قلبن تربعت وسط عروشه .. لحالك
على ضِفاف الهلاك .. اشلون خليته ؟

لسان حالي يقول الحب .. في بالك
ولسان الأيام قال : انك تناسيته

ياشينها .. لا بنيت لباجر آمالك
ولا حل باجر هدم كلما .. تحريته

واللي بقى بيننا .. مامات باهمالك
طاري محبتكْ ، وعطرٍ حقي اهديته

لاشتقت لعيونك .. وحنّيت لوصالك
رشيت عطرك على كفي ، وشميته !!

© 2024 - موقع الشعر