جانا البريد وفيه بعض التعاميم - ذيب بن هاجد السميري

جانا البريد وفيه بعض التعاميم
وفيه القرار ومعه كلمه كريمه

انا احمد الله سانع الدرب للقيم
وقرّب وداع قديد واهل القضيمه

ماشفت منهم غير حشمه وتكريم
والطيب له بوجيه الاجواد سيمه

نبا نسج الرجل مع نجد( يأدليم)
ونبني مع الربع العزيزين خيمه

سنين مرّت في حياتي كما الغيم
نفيض مزنٍ سارحاً عقب ديمه

من كثر ماجا من مسار ومجاهيم
انشد( زبار )عن السنين القديمه

من صبح لين يخيّم الليل تخييم
شغلٌ يفتر باردين العزيمه

فرصة عُمر فيها الرجال اللواهيم
الكل ثوبه نافذه في بريمه

نخبة رجال اهل عزيمه وتصميم
مثل الضمايا اللي على الما محيمه

وتعبت لين انجزت بعض الملازيم
منها القصود اللي منوّل مقيمه

من عقبها نبغا صيانه وترميم
من كثر ماجا الآدمي في صميمه

اقفى شبابي بين ركعه وتسليم
مثل الشجر تصبح غصونه هشيمه

ناكل غدانا بين مشي ودراهيم
وبعض العرب ماقط فارق حريمه

ارهقت نفسي لين وصلتها التيم
مير احمد الله ماكسبت الجريمه

ومجانبٍ شلّة طوال الزلاقيم
يسعون بين اهل الوفا بالنميمه

مجالساً فيها الوجيه المظاليم
مجلس بها لو كان دعوة وليمه

واكملت مدّه في دير حرب وسليم
بن وشحم والعود ينعش نسيمه

مجالساً يكسب بها الرجل تعليم
ماتندرج فيها العلوم الذميمه

وختامها منّي صلاةٍ وتسليم
على الرسول اللي رضع من حليمه

تعليقات الزوار

  • كُل المحتوي و التعليقات المنشورة تعبر عن رأي كتّابها ولا تعبر بالضرورة عن رأي موقع الشعر.
  • بعض صور الشعراء و الشاعرات غير صحيحة، نرجو تبليغنا إن واجهت هذى المشكلة
  • إدارة موقع الشعر لا تتابع التعليقات المنشورة او تقوم بالرد عليها إلاّ نادراً.
  • للتواصل مع ادارة موقع الشعر إضغط هنا.
© 2021 - موقع الشعر