يا ركب عوجوا روسهن بالشكايم - محمد العوني

يا ركب عُوجُوا رُوسهن بالشكايم
مِقدار قيمة ساعةٍ يا هل الهيم

تُلوا مَعاذر هُربٍ كالنعايم
طَفقات رفقاتٍ هِجافٍ مرازيم

هُوج هجاهيجٍ صِلاب القوايم
أسنان جِلّ وافياتٍ علاكيم

يا ركب بالمعروف عُوجُوا هَمايم
والا لمثلي ما عليكم تلايم

مِفدار ما افرغ من بيوتٍ نظايم
في صَفح وضاحٍ رسمته بتنضيم

فِيلا قَضَى ما قلت فالوم قايم
إرخوا ارقاب اركابكم يا مغانيم

خلوا نجايبكم تبوح الخرايم
كل ش ولا ممشى الرخا والتناسيم

لما يبين الكم رفيع العلايم
بيتٍ تعلاه الدخن كنه الغيم

بيت الثنا والجاه بيت الغنايم
بيتٍ بهجر مزبنٍ للمجاريم

بيتٍ به الضرغام حَبس الهدايم
فهد الى عُدّت رجال الملازبم

يا ركب طُقوا روسهن بالقصايم
عند العقاب الصيرمي طيب الخيم

وَدُوا كتابٍ ما بلفظه لوايم
وابدوا جوابي له وقولوا بتسليم

وثنوا سلامٍ عد وبل الغمايم
لسعود نطاح المقابيل صمصيم

من فوق قبّا زومها به تزايم
عاداتها فك المتلي إلى ضيم

ياركب وان جت بين شاري وسايم
وامتدت الهرجه يسلمان وسليم

قُولُوا لحاظين الثنا بالعلايم
نهار صُفر الخيل تقلب مجاهيم

قُولُوا لهم خدامكم بالهضايم
ينخا فهد وسعود مابه تلازيم

ينخا هل العوجا كبار الوهايم
مَوَارِث الصنديد مروي ظما الهيم

عبدالله الي فك وسر الجرايم
عَمّر هل الدنيا بليا مغاريم

وادعى الطلي للذيب ولفٍ ورايم
حتى اودع القناص يجفل من الريم

ترعى به العربان نبت العدايم
ترعى هيت ماجودت بالملازيم

ترعى بشيخٍ ماوطا حد لايم
غبدالله الي هيبته تقعد النيم

بالعلم هو هرجة كبار العمايم
وبالنوم غفوات العرب به هماهيم

وعقل ثقيل ما يشيل النمايم
فصلٌ بعدلٍ يجمع العين بالميم

إلا والمشروع والعدل قايم
سيفٍ يشلع ناب كل اللواهيم

وَارِث حرار يصقلن الحوايم
من مارثة مقرن وتركي صواريم

من عرنة الجودا فروعٍ قدايم
ذِروة سنام المجد شُمً شغاميم

قل يا فهد يا سورهن بالهدايم
ان وصلت الذله حلوق البلاعيم

صِيرُومهن وان جَن عُزمٍ كضايم
لا ما تحرف اقفِيَهِن للمقاديم

انخاك ياليث الثنا والغنايم
وانا بدبابٍ بمصمك ابراهيم

رِجليِ الفلف فوقهن الحزايم
بين الخشب ومداخلاتٍ مباهيم

انخاك يا شبل الثنا والقصايم
بالجاه والمعروف تفزع لمن ضيم

ترى الامور المعضلات العظايم
نطاحته شرواك ما هي تعاليم

ولا تظهر الشكوى وتبدي الظلايم
إلا على اللي ينقضون المحاكيم

وان قلت قولٍ زاد فوق العلايم
فَعَل على الجدان مثل المراسيم

وانت الخيالَ إلي لاشيف دايم
يِجزم على سيله ولاهوب تنجيم

وصلاة ربي عد هَوج النساايم
على نبيً خصه الله بتسليم

© 2024 - موقع الشعر