ان جاد حظك - محمد العوني

إن جاد حظك باع لك وشترى لك
فوايده من كل الابواب تاتيك

وان باربك دلاّ يهزّل حلالك
باردا ثمن لزمٍ يبيعك ويشريك

وان جاد حظك بالمجالس حكالك
صدق مقالك كل من لك يحاكيك

وان باربك دلاّ يكذب مقالك
وتصير كذبات الملا كلهن فيك

وان جاد حظك بالمنازل بنالك
بيتٍ رفيعٍ شامخ الطول يذريك

وان باربك خلاك تنقل عيالك
من دار إلى دار ودارٍ تجليك

وان جاد حظك كل شيءٍ صفالك
وقرايب الخلان كلن يصافيك

وان باربك بين جميع العدا لك
وصار المحب اعدا عدوٍ يعاديك

وان جاد حظك كل شيءٍ عنالك
ويباشرك عند الموده ويعطيك

وان باربك ظليت محدٍ بحالك
ولا بفنجالٍ من البن يسقيك

وان جاد حظك قام واطلق عقالك
ومشى معك في كل درب يباريك

وان باربك جوّد مين الثنالك
وعن كل دربٍ يعقلك ثم يثنيك

وان جاد حظك كل شيء زهالك
حلياه بارواح المجالس تزهيّك

وان باربك شيّن حلايا خيالك
لااقبلت تغضي كل عينٍ تراعيك

وان جاد حظك كل شيء أضالك
يشبه فم القنديل نوره يقديّك

وان باربك عزي لحالي وحالك
أرذل رذيلٍ هافي الجد يوذيك

© 2024 - موقع الشعر