لي صد حظّك عنك سلّم وأقفى
لا تحسبه يرجع لو انّك تراشيه !
والطعن لي صابك بآهٍ ووسفى
سلّم له اضْلوعك ورحّب بجانيه
دامه بيد اللي بوصله بتشفى
ولا تموت بيد من ما تدانيه !!
في قلب المولع .. متى النار تطفى ؟
ياتي البَرَد وامطار تَهْطِل وتسقيه
على حبيبٍ كل ما اقربه يجفى
ويلوح بيدّه ويبعد واناديه
ما يدري إنَّ الوصل نارٍ بها ادفى ؟
وانّه بعاده برد دَيْجور تاليه ؟؟
ارجع و رِد الروح بالصدر والفى
جسمِ بليا روح وشفايده فيه ؟
ويا شوق كف طيوفه اليوم واغفى !
مدام هاجرني .. وش ايجيب طاريه ؟!
ويا مركب العشاق .. دوّر لي مرفى
تعبت أسمّر في دروبه ولا آتيه !
ويا باب .. سد رْياح الاحزان تكفى
أبضوي كبريت الأمل لا تطفيه !
لازم ابلقى قلب لي فيه ملفى
ينزع رماح الزيف والجرح يبريه
والحظ لي منّه تحزّم وأقفى
لازم يجي له يوم يرجع والاقيه

تعليقات الزوار

  • كُل المحتوي و التعليقات المنشورة تعبر عن رأي كتّابها ولا تعبر بالضرورة عن رأي موقع الشعر.
  • بعض صور الشعراء و الشاعرات غير صحيحة، نرجو تبليغنا إن واجهت هذى المشكلة
  • إدارة موقع الشعر لا تتابع التعليقات المنشورة او تقوم بالرد عليها إلى نادراً.
  • لتواصل مع ادارة موقع الشعر إضغط هنا.
© 2020 - موقع الشعر