مـدّات حظّك - محمد المناعي

لي صد حظّك عنك سلّم وأقفى
لا تحسبه يرجع لو انّك تراشيه !

والطعن لي صابك بآهٍ ووسفى
سلّم له اضْلوعك ورحّب بجانيه

دامه بيد اللي بوصله بتشفى
ولا تموت بيد من ما تدانيه !!

في قلب المولع .. متى النار تطفى ؟
ياتي البَرَد وامطار تَهْطِل وتسقيه

على حبيبٍ كل ما اقربه يجفى
ويلوح بيدّه ويبعد واناديه

ما يدري إنَّ الوصل نارٍ بها ادفى ؟
وانّه بعاده برد دَيْجور تاليه ؟؟

ارجع و رِد الروح بالصدر والفى
جسمِ بليا روح وشفايده فيه ؟

ويا شوق كف طيوفه اليوم واغفى !
مدام هاجرني .. وش ايجيب طاريه ؟!

ويا مركب العشاق .. دوّر لي مرفى
تعبت أسمّر في دروبه ولا آتيه !

ويا باب .. سد رْياح الاحزان تكفى
أبضوي كبريت الأمل لا تطفيه !

لازم ابلقى قلب لي فيه ملفى
ينزع رماح الزيف والجرح يبريه

والحظ لي منّه تحزّم وأقفى
لازم يجي له يوم يرجع والاقيه

© 2024 - موقع الشعر