ألف .. اءلف من حروف المزايين
قصيدةٍ قطفت من أجمل بساتين
وآقول : " أروى " وارتوى ابها ملايين
بجبين شمس أقمار حوله يلفون
 
الباء .. بسم الله أبدى بإسمه
قبل إني أبدا في تواصيف " بسمه "
أخاف نحسدها ، تقولون قسمه
لين ابسمت حتى اليتامى يفرحون
 
التاء .. تبت امن الغزل في " تهاني "
لانّي عجزت أوصف لها احلى المعاني
لكن حداني وصفها ل ما حداني
جسم الكوكا كولا على التيلفزيون
 
والثاء .. ثمّنت الشعر في "ثريّا"
مع غيرها فرق الثرى والثريا
عذالها صاروا سكينه وريا
يحميها ربي من حريمٍ يقتلون
 
الجيم .. جمّدت الحروف الجميله
من شان أرد إل بعض شعري جميله
إسم على مسمى واسمها "جميله"
ممنون يا شعري بها حيل ممنون
 
الحاء .. حاول شعري بقدر الإمكان
يهل هملوله و لو كان هتان
"حنان" لو في مثلها بس ثنتان
خلوا نساء الأرض كلهم يعنسون !!
 
الخاء .. خضت البحر عرضه وطوله
والقاف عندي ما توقّف هطوله
من شان يبدع في تواصيف " خوله "
غزالةٍ ما تمشي الا على هون
 
الدال .. دشيت البحر ردت دانه
أدوّر اللي تشبه ف زين "دانه"
رد البحر لو تنشد ب دان دانه
ما تشوف فيني من شبهها يا مفتون
 
الذال .. ذكراها مهي باي ذكرى
مادامها الذكرى على ذكر ( ذكرى )
الذكريات : أما فرح أو كدرى
و هي ذكرها دايم فرح وين ما اتكون !
 
الراء .. "ريم" و فيه أحدٍ سوى " ريم "
خلى الجمال يدرس اف كل تعليم
حتى صُدٍر احكام وأصدِر تعاميم
يُحظر يسمى ريم وفقا لقانون !
 
الزاي .. زاهي شعري باسم " زينه "
كل لبس لى من تلبسه تستزينه
من يمها لو هو يا حلوه وزينه
يصير شين وتبغضه كل العيون
 
السين سر القلب من شاف " ساره "
إن شافها طايف يعوّد مساره
ويقول عدت اليوم باخبار ساره
أصبحت في ساره متيم للجنون !!
 
الشين .. شاقول وشخلي ل " شيخه "
منهو خذاها بين قومه تشيخه
وان غازلوه يقول : ولي يا شيخه !
قلبي موثّق باسم شيخه ومرهون
 
الصاد .. صبحي أصبح اليوم ذا غير
معا ( صباح ) آكيد صبحي غدى خير
لين أصبحت غرد لها أحلى العصافير
وحتى الشجر والورد معهم يغنون
 
الضاد .. ضميت اسمها قبل اضمها
ضوّت حياتي قبل ما أعرف اسمها
" ضياء " ناديت و أنا ف ركن يمها
وسمعت : "لبييه" وضوى كامل الكون
 
الطاء .. " طفله " من غلاها اتّكبر
لأن غلاها كل الأوقات يكبر
بعض البشر بالشكل تكبر و تدبر
و اهي حلاها ايزيد كل يوم مليون
 
الظاء .. ' ظبيه ' و الظبى من وراها
رشيقة الممشى خفيفه خطاها
تتمايل و روحي تمايل معاها
و كل العذارى من حلاها يميلون
 
العين .. عيني عافت أحلى البنيات
بعد " عهود " الحور ما غير .. بويات !
لعيونها افعل أشد الجنايات
يهون لو اقضي بقى العمر مسجون !
 
الغين .. غرت امن الذي له عياده
وانا الحكيم اللي لديه الإفاده
ثلاث مرات إخذ من شوف " غاده "
ولا يضرك باس بالكاف والنون
 
الفاء .. فدوى كل عمري ل " فدوى "
من دونها عمري كأن دون جدوى
من قال ان العشق مافيه عدوى !؟
تهيم الارض و من نظرها يهيمون
 
القاف .. " قمرا " اسم فوق المسمى
كن القمر هو من باسمها تسمى
أوصافها فاقته أوصاف جما
يكفي تبان الصبح والغير مركون
 
الكاف .. " كوثر " ما ظما من قربها
وشلون منهو من حلاها شربها
كل البشر من عجمها أو عربها
يدعون فالجنه مثلها يحصلون
 
اللام .. لا ! وآقولها ب عالي الصوت
ل غيرها لو هو مرصّع ب ياقوت
مع " لولوه " والله مبخوت مبخوت
واللول زاهي لو قضى أعوام مكنون
 
الميم .. " مريم " ، ماهي ب بنت عمران
لكن بالعفه ترى الأمر سيان
لو حاصروها جيش فرسٍ و رومان
يخسون شعره من شعرها يلمسون
 
النون .. " نوره " تكحل بشوفها العين
لان بحلاها ما انخلق مثلها اثنين
زينٍ على زينٍ و زينٍ على زين
حتى العيال ب حسن نوره يدوخون
 
الهاء .. هانت كل ما بي من اهموم
من يوم بسمة " هند " انا ب سعد إلى اليوم
ابروق وامزونٍ بلا رياح وغيوم
وشلون ؟ ناظر هند بتعرف وشلون !
 
الواو .. " وضحى " مت فيها هياما
وعدّيت " ابن عدوان " عشق و غراما
" البارحه يوم الخلايق نياما "
أبدعت في وضحى من أشعار وفنون
 
الياء .. يعني لازم اختامها مسك
" يارا " تنادي : يا الحلا جيت أنافسك
بالانقلش : her love is dangerous risk
" لو الحلا يذبح " بعدها تموتون !!

تعليقات الزوار

  • كُل المحتوي و التعليقات المنشورة تعبر عن رأي كتّابها ولا تعبر بالضرورة عن رأي موقع الشعر.
  • بعض صور الشعراء و الشاعرات غير صحيحة، نرجو تبليغنا إن واجهت هذى المشكلة
  • إدارة موقع الشعر لا تتابع التعليقات المنشورة او تقوم بالرد عليها إلى نادراً.
  • لتواصل مع ادارة موقع الشعر إضغط هنا.
© 2020 - موقع الشعر