بغداد

ياعيد سولف لي عن اعياد (بغداد)
واعياد (كابل)كيف واعياد (غزّه)

كيف الزمن سوى مع احفاد الأسياد
وكيف امة(ن)سادة كذا ضاع عزّه ؟

تزداد ضعف وذل مع زود الأعداد
اموات.. شوف الدم مايستفزّه !!

اعراضنا تنداس وتمزق اجساد
اطفالنا قدامنا... كل حزّه

واخواننا بالدين والعرق..تنباد !
ياحيف.. حتى روسنا مانهزّه !!

صرنا كما الأنعام صدّر ووراد
ماهمنا الا ضرب عنبر ومزّه !!

وودايع(ن) تكبر على سرق الأجواد
ومن كثرت امواله كبر صار رزّه

ونرقص ورى هيفا ودالي ونزداد
فخر اننا شعب(ن) تراقص لوزّه

يمكن نحاول بالطرب نبني امجاد
مجد(ن)هزيل(ن)طايح قبل كزّه

وبسم التقدم نارد احواض الأوغاد
ونشرب.. لو ان نفوسنا مشمئزّه

وياعيد لو نضحك ولو نلبس جداد
مالك مثل ماكنت ياعيد...فزّه

وسلم لنا تكفى على اطراف بغداد
وانقل معاذيري لكابل وغزّه