ما ينذبح سرحان .

لـ محمد البياضي، ، في غير مُحدد، آخر تحديث

ما ينذبح سرحان . - محمد البياضي

ما ينذبح سرحان ياللي ذبحته
ما دام توصف بالشجاعه كما الذيب
وشلون تصخي في شجيع ٍ لمحته
متعلي ومن فوق روس المراقيب
ما هو بحولك وان قرب منك بحته
محلل ومعذور لو كان ما نيب
راضي بفعلك ساعة انك بطحته
في بندق ٍ بالرمي ما تخطي تصيب
ترميه رميت موت ليتك جرحته
والا كسرته من يده والعراقيب
وان طاح في حسب اعتقادك فضحته
شهرت به بين العرب والاجانيب
وبحبل في شجره بعد ما سدحته
علقته وكنه جزاء له وتعذيب
والا على الحيوان باب وفتحته
متخيله عبره لغيره وتاديب
مضرب مثل هالذيب ليتك نصحته
في طلقة ٍ من بين اذانيه تهويب
من بعدها ما يعود وادي سرحته
يرزقه ربي من خلافك معازيب
وان شال شاه من الحلال وسمحته
عنها يعيضك عالم السر والغيب
الناس عاشو قبل والحال كحته
خاواهم وعشوه من شمخ النيب
طالبك لو آخوه فالوقت لحته
تجوز عن رمية عطيب المضاريب
وتصير قدوه واجر ربي ربحته
هذا الصحيح ولا حرام ٍ ولا عيب

مناسبة القصيدة

من باب الرفق بالحيوان لما نشاهده من مشاهد مؤلمه عن ذبح الذيب وتعليقه على الشجر او على اللوحات الارشاديه في الطرقات .
© 2024 - موقع الشعر