خيل القوافي مسرجه جالها اضراس
وبنات فكري وقفت تعتزيله
ومن الحكم آخذ جديدٍ ودرّاس
وقول العوارف ما لقينا مثيله
الطيب ميزان المراجل مع الناس
ومن لا يذب الريع ما يتنحيله
الطيب علمه يذكره كل عساس
والنعم دايم يرتكي له عمليه
وبحر المراجل غبته در وألماس
ومن لا يجيد الغوص صيده هزيله
والمال عند الناس ماهوب مقياس
لو كان هالميزان جاء فيه ميله
المال قدم خايب سبال وأنجاس
اللي في سوق الطيب ناشف حصيله
والمال ما يخر هل العزم والباس
اللي تسوق المال تبغا الفضيله
أحدٍ كسّبه طيب عزٍ ونوماس
وأحدٍ يحلبه حلب جوّد صميله
والثانيه إن شرفوا روس الأطعاس
قطعان بدوٍ للوسامي محيله
قطعان بدوٍ جمعهم يرفع الراس
أهل الفعول الطيبه والجزيله
يبون قفرٍ ما بعد جاه دواس
فيه أم سالم غردت غب سيله
من شاف نبته قال بستان غرّاس
متخالطٍ نبته سواة الخميله
يستاهله ذودٍ نسوقه بنوماس
وتستاهله خطو السناد المهيله
اللي زهت زين الجنايب والأجراس
وإن جاء التحدي كم عنيدٍ تشيله
هاذي طراة الروح يا طيّب الساس
والعمر يقصر والليالي طويله
وهاذي تماثيل على صدر قرطاس
وكلٍ يحث خطاه وعقله دليله

تعليقات الزوار

  • كُل المحتوي و التعليقات المنشورة تعبر عن رأي كتّابها ولا تعبر بالضرورة عن رأي موقع الشعر.
  • بعض صور الشعراء و الشاعرات غير صحيحة، نرجو تبليغنا إن واجهت هذى المشكلة
  • إدارة موقع الشعر لا تتابع التعليقات المنشورة او تقوم بالرد عليها إلى نادراً.
  • لتواصل مع ادارة موقع الشعر إضغط هنا.
© 2020 - موقع الشعر