إياك تذكرني ..!

خليتني في درب حبك وصديت.
عن قلبي اللي بالمعاليق ناداك.

لاتحسب اني بااتبعك يوم قفيت.
ادوس قلبي .. لو تكاثر ضحاياك.

برجع اعيش العمر مهما تغليت.
الوقت موعدني ... بالايام يمحاك.

ماعاد تفرق عندنا رحت او جيت.
مثلك مثل غيرك دقايق وننساك.

عندك حياتك جمرها ..! ماتمنيت.
ماتنفعك .. ضربة يمينك ليسراك.

عدك ندم تارد عليه الشواميت.
وجمر القهر حره بالاضلاع فتاك.

أنا دحمت الليل دونك .. وغنيت.
وانته ركبت الصد ليله وسراك.

مهما جرحت الليل مهما توقيت.
الليل ماهمه ..... تجاريح شرواك.

انا عرفت الحب للحب توقيت.
وانته تواقيتك لها درب مسراك.

قدمك رجل مالي زمانه سرابيت.
طب وتخير.! فالسرابيت برضاك.

لكن لو حدك زمانك .. ومليت.
اياك تذكرني .. ترى اياك تنهاك.