فصل المحبة ص35

ياكلمتي تمركزي في سجلّي
فصل المحبّه صاد خمس وثلانين

هنا مواضيعي وهذا محلّي
واستديو اخباري يبثّ العناوين

كان الخطا خمس وثمانين ملّي
معه الصواب اقدّره حول مترين

أعرف خطاي ولاهو بجايزلّي
ومن قال انا ماعمري اخطيت مسكين

والحبّ ماهو كلمة لسان ياللي:
تخطي خطاك وتحسب الناس مخطين

ولاهو دلع زايد ولاهو تغلّي
الحبّ حبلٍ بالرضى يجمع اثنين

علّم فقيه العلم يابامجلّي
فقيه يمكن يحسب القلب قلبّين!

أعطيته التعريف جزئي وكلّي
واذا يبي برهان عندي براهين

واللي تبلاّني بحبّه تبلّي
كنّه على الابهر طعنّي بسكين

أمّا يعالج طعنته قبل اولّي
والاّ ذبحني واشهدوا يامسلمين