يالتويتر دمت يالوجه الطليق

لـ عبدالعزيز المشعل، ، في غير مُحدد، آخر تحديث

يالتويتر دمت يالوجه الطليق - عبدالعزيز المشعل

يالتويتر دمت يالوجه الطليق
بيّنت باسمانها واعجافها

القلوب اللي ورا السد الغليق
أظهر اللي جوفها مغرافها

النوايا السود وافكار الرقيق
تحمل الطاغوت فوق اكتافها

والتملق والتمسكن والنعيق
ما يدور العز تحت أكنافها

يارفاقه والردي ما له رفيق
لا حداه الجوع ذكّى خرافها

المجامل فالقيم مثل الحريق
ياكل اللي قدمها وخلافها

والحرار اللي على العليا تويق
فالمواقف تحتمي ميقافها

ما تُهان ولا تُذل ولا تضيق
لو تروح الروح دون اشرافها

وانت ياللي مسويٍ فيها صديق
والله انك ما دخلت اطرافها

الصداقة عندنا حبلٍ وثيق
بالمكارم ساميات أهدافها

لا تسوي زحمةٍ وسط الطريق
والمراجل ما تدلْ مشرافها

كلْ موارد عرْفْتك ما تبل ريق
يا غشيمٍ خمّها بلحافها

ياحليلك شاعر وقلبك رقيق
والغواني مبتلش باوصافها

تلتهف لا شفت لك لمعة بريق
تحسب انك يالشقي خطّافها

ارفق ارفق بالزفير وبالشهيق
الحِمى يوقع بها من حافها

خطوةٍ ما تهتدي بك للرحيق
لا يجرك طيشك فمجرافها

وان عرضت الصورة اللي ماتليق
خاف ربك .. والقيامه خافها

والله انك تحتمل ما لا تطيق
إثمها واثام كل من شافها

النصيحة طوق منجاة الغريق
عزتي للي تجيه يعافها

© 2024 - موقع الشعر