شدي رحالك شرق ...!

لو تسأليني ..! عن شعور القصيده.
قلت الحقيقه .. عطرها من جنابك.

مشاعري ماهي سوالف جريده.
نزفتها ....... من دم قلبي كتابك.

سريتها ...! يم الديار البعيده.
وانتي ملكتي روحها وش جوابك.!

لبستها الاحساس ... حله جديده.
وناداك قلبٍ .. دق بالوقت بابك.

تزهمني اطيوفك لو الخلق هيده.
وافز ادوّر في سحابك ..! شرابك.

اسطورةٍ للغيد ..! روحك فريده.
ذوق .. وتغنج .. والتحيه هلابك.

الحب من ربي ... عسى الله يزيده.
الله رزقني ........ بالمحبه وجابك.

بنك الغلا .! بالجوف زايد رصيده.
لا ترخصين القلب ينقص حسابك.

في مدخل اعروقي تركتك وحيده.
تقرآ المشاعر .. للمشاعر خطابك.

بين الغلا والشوق رحله سعيده.
شدي رحالك شرق.! يامرحبابك.

(من نطرده ملحوق) جمله مفيده.
إلا شعوري .... مالحق لي سرابك.

في بحة الهمسه .... هبوب الوقيده.
وحرارة اشواقك تتطاول شبابك.

أحس في قلبك ... ونبضة وريده.
وأحس في صوتك شعورٍ نشا بك.

اجيك لو ان الليالي ...... عنيده.
وكان الزمن مخطي تراني صوابك.

بي غيرةٍ ...... ماهي علينا وليده.
بتعلمك عنها .... مواطي ترابك.

حيثك عطر دنياي .. توله فريده.
وشذى مسام الجسم عطّر ثيابك.

لا تسأليني .! عن عطور القصيده.
كل القصايد عطرها من جنابك.!