لولا الغلا والشوق

لولا الغلا والشوق بين الاحبّه
مازانت اخلاق العرب ربع ساعه

ولولا الحيا كلٍٍّ وقع بالمسبّه
بالسكّه العوجا يزيد اندفاعه

لكنّ ماكلّ الحيا نستحبّه
بعض الحيا رفعه وبعضه دناعه

من استحى من ربّه وطاع ربّه
اسلك طريقه كان فيك استطاعه

ومن استحى لا ينطق الحق كبّه
بعدك عنه في حد ذاته شجاعه

ولولا الرجا ماينفع الجرح طبّه
لو ياخذ المجروح جرعة مناعه

ولولا القناعه يفقد الرجل لبّه
في حزّةٍ فيها تقلّ القناعه

ولولا الطمع ماذاقت النفس حَبّه
من زاد متضرر وشاكي مجاعه

ولو انّ كل اوضاعنا مستتبّه
صار الردا والطيب ربع وجماعه

وتصير حتى قمّة الضلع خبّه
والقاع يصبح راس والراس قاعه

ولولا القراده ماعرفنا التشبّه
بالغربي اللي مانفعنا اتّباعه

ولولا الغبا ماشيّد العبد قبّه
يقول ادوّر من وراها شفاعه!

لو كان صاحي ما تشفّع بصبّه!!
عجيب حال المبتدع وابتداعه!

ولو كل مذنب للعواقب تنبّه
ماقال للشيطان سمعاً وطاعه