( متصل ) ...!

ودي اشوفك متصل واتصل فيك.
اما على الموجات والاّ بالاحساس.

ياللي ملكت الفكر رحمة معاليك.!
ارفق على اللي ذايبٍ فيك محتاس.

ناداك قلبي ... والقوافي تناديك.
والله عطاك القلب من بين هالناس.

روح الشعر متعطره يوم اغنيك.
متزينه لو المسا فاقد احساس.

عين الغلا متفجره جوف مغليك.
في ظلمةٍ فيها الاحاسيس جلاس.

يظماك قلبي.! والمشاعر مساقيك.
والوصل ماشفته.! بالايام عساس.

إشرب غلاك وطيعني كان يمديك.
ترى المحبه عرقها اليوم حساس.

مثل النخل معطيك مالذ معطيك.
لكن عزوفك للنخل كنه الفاس.

العمر روّح والليالي مدابيك.
والجوف ولع والغلا صابه انعاس.

القاف بعيونك تولع ويشكيك.
مثل الحبر يومه رهينه لقرطاس.

ودي اشوفك متصل واتصل فيك.
هذا شعوري و انتثر مثل الالماس.