سهرة ألم ...!

اعيش باحساسي مع الناس للناس.
انزف ألم.! واعيش بالوقت محروم.

احدٍ يشوف احساسنا ماله اقياس.
و احدٍ يهل الدمع ساهر ومنجوم.

اكتب حقيقه اطوي اليآس بالبآس.
شامخ وعيني ترقب انجوم واعلوم.

سهرة (ألم) فيها المشاعر والانفاس.
ضحية التفكير ..! في داخلي دوم.

تحرقني الاشواق يضرس بي اضراس.
حبٍ طحن قلبي وعقّب لي اهموم.

اخفيتها ..... مابين ضلعين ولباس.
حتى نحل جسمي من الهم واللوم.

متى تزين ونضرب الجذع بالفاس.
الفاس عندي والجذع فوقه البوم.

متي يطير البوم او ينعس انعاس.
واعيش بالقمه ..! اباري لي انجوم.

القلب كنه فوق الاشواق محماس.
والحظ ثاوي .! ماتنهض ولو يوم.

حاولت ابينها ودقيت الاجراس.
وردّت حروفي.! شايله همها كوم.

التجربه برهان.! واغلى من الماس.
والعين لو تنعس نحرنا لها النوم.

(لا قاضمٍ حبه ولا شاربٍ كاس).
شطرٍ لْناصر جابه الفكر ملزوم.

بالعقل تقراني على عين عساس.
وبالقلب تلقاني مثل حرٍ يحوم.

مهما بلغ حبي مع القلب واليآس.
عند الكرامه يبطل البيع والسوم.