يا مشغلا بالك:

حل المساء بالخير ربي يمسِّيك
لو غبت قلبي في مساء الخير مسَّاك

في وحشة عيوني على غياب عينيك
اعاني اللهفة على شوف عيناك

في هاجسي صوت بشوقي يناديك
لو تسمعه في حسرتي حين ناداك

مساي ولا شيء من غير اماسيك
والعالم الله ..وين يا بدر ممساك؟

بعد الليال الزاهية في قماريك
عانيت ظلماء الليل من غير قمراك

لبيه يا سعود الليالي ..ولبيك
يا الحظ ؛ لو اللي تلبيه لباك

قالوا لي العذال (يا قل واليك)
لا توالي اللي ما بعد يوم والاك

يا مشغلا بالك ولا أحدٍ مراعيك
ولا بطرف العين لو يوم راعاك

خلك مع الوافين دامه مخليك
لا تنشغل به لحظةٍ يوم خلاك

ما كل من حبيت وأغليت يغليك
لا ينتزع واهسْك مع شخص ما أغلاك

ما كل من تأتيه بالحب يأتيك
ولا كل من تشفق على جيته جاك

أللي تفكر فيه لا ذي ولا ذيك
لا أحتاج جاك ولا اغتنى عنك مع ذاك

لا تشغل الخاطر برجوى مجافيك
راع الجفاء إجفاه من يوم جافاك

متعذبٍ ، بالحب تسهر لياليك
وتشوفها بلواك بالوهم ليلاك!

من قرد حظك فيه مولاك باليك
واعزتي لك من عناء كبر بلواك

عندى دليل إنه من العام ناسيك
لو هو يحبك صدق ما هوب ينساك!

تسهر تخيل نائما ما حلم فيك
لو فيه من طبع الوفاء كان وافاك

في خاطره ما مرة جاب طاريك
ولا فز قلبه لحظةٍ عند طرياك

لا تنخدع فى ضحكة السن يغويك
بمصيبتك خلاك من بعد ما اغواك

دور على غيره من الناس يفديك
يغليك من قلبه وبالروح يفداك

معناه ما هو عكس سامي معانيك
شرواك بالمبدأ ومعناه معناك

وسعادته ، في كل شيءٍ يْهَنِّيك
من كثر ما هو في هناك يتَهَنَّاك

حتى ولو يزعلْك يرجع يراضيك
ودِّه ؛ لو إنه يفْرش الكبد لرضاك

على العَهَد وافي وبالروح يشريك
ما (يلعب الحبلين) في حب الإشراك