بالك تلومني - محمد عويضه

الله وكيلك ذبحني الهم بغيابك
تعالي أرجوك مافيني يكفيني

أبيك جنبي هنا وأتنفس أطيابك
من قال جنبي ! تعالي في شراييني

أشتقت لرضاك كثر الشوق لعتابك
ولصوتك وبحّته وإنتي تناديني

بلسانك إسمي يزين بطعم عنابك
وبلسان غيرك ثقل دمّه يعنّيني

أشتقت لعيونك الحلوين وأهدابك
شفتي عيونك ؟ أجل بالك تلوميني

من حسنها كل مافيني على بابك
الله يعينك على حاجة مساكيني

بغيابك أتذكر إللي فات واهابك
أول لقا يوم أنا شفتك وشفتيني

يوم أرتخت لثمتك وأستغفر حجابك
كن الهوا يوم جاب العيد ناويني

بعثر عباتك وقفتي ثم تلوّابك
في ذمتي وقتها ثارت شياطيني

والحين وينك تراني ضعت بأسبابك
تعالي وسوّي إللي يعجبك فيني

الموت أهون علي من قسوة غيابك
تعالي أرجوك مافيني يكفيني

تعليقات الزوار

  • كُل المحتوي و التعليقات المنشورة تعبر عن رأي كتّابها ولا تعبر بالضرورة عن رأي موقع الشعر.
  • التعليقات المنشورة غير متابعة من قبل الإدارة. للتواصل معنا اضغط هنا.
© 2021 - موقع الشعر