الله من قلب(ن)عنـا الوقـت يبـراه

الله من قلب(ن)عنا الوقت يبراه
قلب(ن)براه من اقشر الوقت باري

الوقت ضده والليالي تحداه
وفيه العنا والهم بايع وشاري

والحظ زاد القلب بالفعل بلواه
وصبري نفذ مافاد طول انتظاري

للصبر حد أن طال وقت المعاناه
ماهي سوالف جمع مال ومصاري

منهو فعل شر(ن)جزا الله يلقاه
مايكون شئ الا الولي عنه داري

يالله ياللي كل من ضاق ناجاه
يافارج(ن)ليّوُب عقب العزاري

ياعالم(ن)بالغيب ماشي يخفاه
والنفس يقرأ غيبها والطواري

تفرج لعين(ن)نومها ماتهناه
وقلب(ن)له باليوم مليون طاري

وقت(ن)تغير بتجاهه وممشاه
درب اليمين اليوم حوّل يساري

وصارت طيوره تشتبه في مزاياه
ترم الرقيعي تحسبنه خضاري

وبعض الرجال يقول هرجه بعمياه
ومن كثر مايكسح على الكسح ضاري

والرجل واضح ينعرف من حكاياه
الحكي لرجال عرف ومواري

ومن مايعز وتفعل الطيب يمناه
عسى طريقه في طريق أنتحاري

ولصار متساوي مماته ومحياه
ودك تحذفه في خلي البراري

والطيب قول وفعل ياللي تمناه
وعزي لمن ذكره من الطيب عاري

ويلام من يقدر ولا الطيب سواه
ولا تنقبل غيبه بليا أعتذاري

الطيب ضلع طويق صعب(ن)معداه
صعب(ن)على من هاب درب الخطاري

ودربين معروفين مابه مراواه
طيب وردا والرجل حر إختياري

يمشي على ماتود نفسه وتبغاه
ممشا ظلام الليل غير النهاري

والطيب حسنه وأكرم الله من أعطاه
والا الردا سيّه وجو(ن)غباري

وكل(ن)على فعله ليا مات يجزاه
والله خلق للناس جنه وناري

ومن ماطلب ربه وفي دينه ارضاه
العمر ماهو دايم الدوم جاري

ياللي تشكى من زمانك وذكراه
الوقت عبره والليالي مساري

كم واحد(ن)ماجت على الكيف دنياه
دايم وحظه بالحياه أنحداري

وترا الزمن ماهو بكيفك تمطاه
إن طاعلك والا تطيعه اجباري

يا كم حساب(ن)دون الاخطا حسبناه
وفيها وقعنا ماحمتنا المداري

والادمي أن كان ما ربه أذراه
ماعاد له عن دبرت الله مذاري