حـيّ مـن عنّـا لـي

حيّ من عنّا لي امثالي
لي يزين الطّرس تسجيله

مرحبا يا راحة البالي
قمت له وعرفت تاويله

من محبّ عندنا غالي
هام يشكي لي وانا اشكيله

به موادع زين لجبالي
قال نفسه عنده ادخيله

يا شفاتي طاب لك فالي
لا اتّابع قلّة الحيله

جرّب اللّي يقطع الخالي
مورسدس ومن تماثيله

نحرّه سيداتٍ اطوالي
لا تمشيّ في مهاييله

شارعٍ يمتد زلاّلي
لين تظهر لك مغاتيله

ووصله لو دونه اهوالي
واغتنم شوفه ولو ليله

عندما للرّمسه ادلالي
بنّها تضحك فناجيله

بيننا وان دار فنجالي
عنك همّ القلب بتزيله

كلنّا في الشّف عدّالي
لا فرق فينا ولا دعيله

وانت منّا يا بعد حالي
روح والمجروح بنشيله

يالغضي يا زين لجبالي
خذت روحي عندك ادخيله

والختم صلّى الله اكمالي
عد ما في الكتب تنزيله

تغشي المختار والآلي
ما دفق برّاق لمخيله