ياناشـدن عنـا ترانـا البقـومـي - طامي الرياحي

ياناشدن عنا ترانا البقومي
اهل الجمايل طيبين السلومي

اعلامنا من فوق الاعلام تومي
في الوقت هذا والسنين القديمات

فينا الوفا والطيب والمجد مذكور
من جدنا الاول الى نفخة الصور

يكتب لنا التاريخ بحروف من نور
عبر دواوين العرب والسجلات

من الخليج لجده الدار حايل
ومن الطوال الى طوارف محايل

متميزيناً عن جميع القبايل
باشيا لها تاريخ موكود وثبات

حنا لعشاق البطوله مدارس
لا عدوا الفرسان فعل الفوارس

خيالنا يعدل ثمانين فارس
قاله حكيمن وأكد العلم بابيات

قصيدته فينا لها اسنين وسنين
معروفةٍ عند القبايل لا ذلحين

عند الرواه وفي بطون الدواوين
ما مات قول الصدق لو قايله مات

والثانيه بنت الشيوخ حددانا
تهدي بحبتها على من نصانا

اللي يقابل في المعارك حدانا
لا غطرفن بيض البنات العفيفات

ودخيلنا يمشي بكل الجزيرة
لا مل من ديرة توجه لديرة

ماواحداً يقدر يعارض مسيره
لوكان لاخصامه سيوفٍ وريعات

وبيوتنا ماحداً يذير ضعنها
وديارنا ماحداً كسب شبر منها

مشطريناً كل طماع عنها
بسوف هنداً في الملا قا رهيفات

ياكم وكم وكم ويا كم وياكم
طمعوا بنا قومٍ ما يلحقهم الذم

وجونا وقمنا نلحق الدم بالدم
وعادوا بخيبات الرجاء والتشمات

محددين ديارنا بالجماجم
جماجم الا بطال من كل هاجم

تشهد بما قلت العرب والاعاجم
وحدود داراً في ذرانا حصينات

رجالنا حط الرجوله شعاره
ولوكان مات بجوع ماخان جاره

قصيرنا معنا يلاقي وقاره
نذريه في ظل البيوت الذريات

فينا الشجاعه والوفا والامانه
ولا نخون ولا نحب الخيانه

ولا نقبل العيشه بذل ومهانه
في صدورنا نحمل نفوسٍ عزيزات

والضيف لاجانا لقى البن والهيل
وحلو النبا مع شمخ القود والحيل

والعود الازرق في مجالس حلا حيل
وسوالفٍ تشف الكبود العليلات

هذا وانا اصلي من صعاب المراسي
ابنا كليب اهل الفخر والحماسي

فرعٍ تفرع والبقوم الاساسي
هذا كلام الصدق ماهو دعايات

انا ولد من تعرف الناس طيبه
ابن غفالان اللي فعوله عجيبه

مهل ذرا ربعه ولا طم حريبه
كساب كلمة نعم في كل الاوقات

اللي بمخلابه كسر باب شبرا
يوم انقفل دون الجميع وتعبرا

في معركه في وقتها تعد كبرا
بين الشريف وجيش الاخوان بالذات

يو التجوا في القصر وانصك بابه
والصفر جاله فالصدور انحطابه

جاهم تقول مسيراً للقرابه
ما خاف من صكات الايام صكات

يوم القذايف من سماها تواقع
والماس الاحمر في سماه ايتصاقع

سقم الحريب اخو هوا ما تراجع
حتى فتح على معاديه ثغرات

وجدي عتيق اللي يصوغ القوافي
وان كلحت خلف الركاب الاشافي

يروي من العدوان روس الشلافي
يوم اليماني بالفعايل طليقات

وربعي بني مريح سلايل كحيلان
اهل القنا والسيف والرمح والزان

وان جا نهاراً فيه للصفر دندان
لطامة وجيه المعادين ريحات

قيفٍ ما مثله فالقبايل ولا قيف
حماية الميقاف يوم المواقيف

وان لجلجن بيض العذارا الغطاريف
لهم على جمع المعادين سطوات

رجالهم لاقال في الموقف الحار
( سقم الحريب مروحي) والدخن ثار

تقول معه الموت لعداه زوار
ويوجهه لنفوسهم بالاشارات

ومنا البضاعات النشاما هل الطيب
اهل الجمايل مكملين المواجيب

في طيبهم ما يلحق الشك والريب
النعم والله في رجال البضاعات

ومنا رجالاً في المواجيب يوفون
جعاثنه يوم اللقاء ما يهابون

كلٍ يقول النعم بالاد جعثون
لاجا نهاراً فيه صوله وجولات

وايضا الدمانين ونعم بالدمانين
لطامة العايل صعوط المجانين

اللي على القاسين بالفعل قاسين
في طيبهم ما لحقنا يوم شكات

والاد قرمود النشاما هل الجود
اللي لهم بالطيب تاريخ مشهود

سيفٍ على روس المعادين مجرود
ولهم على لطم المعادين عادات

وايضا الجحيشات الحلاحيل الابطال
اللي لهم في قمة المجد منزال

منهم عذاب عداه لطام من عال
امثيب اخو نفلا زبون الونيات

ومنا العبارا والنعم بالعبارا
لاجا نهاراً فيه صوت المثارا

مايعرفون المسكنه والمدارا
في ساعةٍ فيها كثير الغيارات

ومنا الرماضين ونعم بالرماضين
قومٍ على الامجاد والطيب ظارين

ميزانهم يرجح بكل الموازين
لاعنكب الداخن ولجن الاصوات

ومنا السواهر عزوةٍ باسهم باس
قومٍ لهم في قمة المجد مجلاس

حريبهم في ساحة الحرب ينداس
وصحيبهم يلقى السعد والكرامات

ومنا الفضول اللي على الموت يردون
لاجا نهاراً فيه طاعن ومطعون

دقلاتهم منها الرضاعا يشيبون
لاثار عج المسرجات المغيرات

ذولا عيال اكليب عديتهم عد
اللي فخرهم عبر الاجيال يمتد

لو شدت اجبال السراوات ماشد
وامجادهم تعرف ولا هي خفيات

وباق البقوم اذكر فخرهم ولا انساه
اهل الكرم والمجد والجود والجاه

واهل السيوف اللي على الدم مسقاه
واهل الحميا والوجيه النقيات

افروع قومٍ عاشوا بعز واكرام
من قبل الاسلام وبعد دين الاسلام

ولا فيه فرع الا وله عدة اقسام
لكن ما بغى ادخل ببعض المتاهات

اخاف لو اذكر بعظهم بتفصيل
وانسى بعظهم صار للقصد تاويل

واصير عرضة راعي القال والقيل
اللي على العالم يحب التصنات

لكن باعد الفروع الاوايل
مادام انا عندي عليهم دلايل

واترك خوامسهم واكب الفصايل
للي معه عنهم دواليل اكيدات

من البقوم اذكر رجال ارحماني
لطامة العايل عراب المجاني

اهل البنادق والقنا والسناني
واهل الشجاعه والفخر والحميات

وايضا القروف اللي تضد الضديدي
رجالهم لاقال انا ابن الحميدي

ثم سل سيفٍ في يمينه حديدي
يطرح عشاء سحم السباع المجيعات

وايضا دغافلةٍ يضدون الاخصام
رجالهم سطام للخصم لطام

يركض على جمع المعادين قدام
لاجردوا حدب السيوف الصقيلات

ومنا الجنبه مخضبين الجنابي
سقم المعادي لاهبا كل هابي

سيفٍ تنومس سلته والنصابي
في وقتنا هذا وفي فايتٍ فات

وايضا البدارا اهل الكرم والشجاعه
في الحرب يسقون العدا سم ساعه

فيهم على لطم المعادي براعه
واهل الحميا واهل نخوه وفزعات

والموركه منا بلاشك وجدال
سقم العدى يوم البلاوي والاهوال

كم دم فارس قوم بسيوفهم سال
وربعه على فقده تسوي مناحات

والاد داهم محتمين الدبيله
اهل السيوف الصارمات الصقيله

واهل الخيول المسرجات الاصيله
اللي لها على المعادين غارات

وايضا رجالاً في نهار الحرايب
على معاديهم عذاب وعقايب

كرزان مافيهم ردياً وخايب
ولا مثلهم يركب على الخيل بالذات

واذكر مخضبة القنا الاد سامي
سميان لاثار الدخن والعسامي

يردون حوض الموت ورد الضوامي
ويخضبون من العدا السمهريات

ومنا المرازيق ان زمى الحيف للحيف
فرسانهم ما يعرفون المحاريف

يسقون من دم العدا شذرة السيف
هذا كلام الصدق مافيه زلات

واذكر هذيل ولو هرجنا عن اهذيل
نقول نعم ولا عليهم مداخيل

وقفاتهم تشف القلوب المغاليل
وعدوهم ماله نجاة وسلامات

امدح بني عمي ((ظهور السواني))
اللي بفعل الطيب تطلق لساني

يشهد لهم بالطيب قاصي وداني
ماهوب قول اهل الحسد والظلالات

والنعم في كل القبايل مشاكيل
قبايلٍ يوفون بالوزن والكيل

ما يقبلون الظلم والضيم والميل
وسط الجزيرة كال الجبال المنيفات

في ما مضاء كلٍ وقف دون حده
ماحداً تهاون دون ميراث جده

واليوم كلٍ يلتبس ثوب قده
زال الجهل من روسنا والحزازات

ما عاد يوجد في الجزيرة سلاطين
الا الملوك العادلين الميامين

اللي سعوا فينا بالانصاف والدين
وصرنا خوان نعيش عز ومسرات

وختامها صلوا على صفوة الناس
عد البشر وعداد ماهب نسناس

وعداد ماحبراً كتب فوق قرطاس
على رسول الله سلام وصلوات

© 2024 - موقع الشعر