مل قلب (ن) صار للهم فاقصاه اهتواش
كل ساعه يلتوي به من اهمومه جيوش

لو يباع القلب بابيع انا قلبي بلاش
واشتري لي قلب مهبول(ن) ايحدر الفروش

لجل يرتاح الحشاء واتهنى بالمعاش
لاهموم ولا تفاكير خدش من الخدوش

تكبر جنوبي ولو كان انام بلا فراش
وابلع الزلات مازعل ولا انفرز واهوش

مير انا قلبي معنى وحضي معي ماش
كل مابغاه ايتقدم مكانه دار بوش

وان قدح همي بقلبي مثل قدح الفلاش
اتنحر ديرة(ن) مابها غير الوحوش

ديرة(ن) ماسيرتها الغنم بعد الرشاش
مانزلها الشاوي اللي يحوش الضان حوش

من جميل العشب ملتبسة (ن) مثل القماش
قاعها وحزومها والحواجر والحشوش

اشهد ان ممش (ن) بها يعطي القلب انتعاش
خير من سوق (ن) حراجه يدوش الراس دوش

سوق (ن) اقشر مابه الا الطلايب والهواش
والتسكع والتلكع وغاشش ومغشوش

فيه ولد اللاش مايدري انه ولد لاش
شايف (ن) نفسه على الناس وان حرك يطوش

خبل قوم (ن) بالحسد والحقد والبخل عاش
اضعف املاكه ما يرضى عليه احداً ينوش

مثل ماقال المثل راس ظبي بلا عراش
اذبحه عند المنافق وتجميع القروش

لا تناقش معه ماهوب كفون للنقاش
المغفل قاصر الباع خدام الدبوش

دون فعل الطيب دايم على عينه غباش
يندرق دون المواجيب ابو كف (ن) مروش

يالعله فدوة اللي لمن جاله هشاش
طيب (ن) وجهه لمن جاه من ربعه بشوش

للوفاء والمجد والجود والنوماس حاش
كل ماجوه النشاما بجيتهم يشوش

ماحزم كفه عن الواجب الرسمي بشاش
ولا بنا بينه وبين الكرم والجود حوش

يدفع احقوق الرياجيل في الميقاف كاش
بالكرم والجود ولا بتنتيف الرموش

اشهد ان الطيب ماهوب نفش (ن) وانتفاش
يدركه رجلاً يمينه تجود بما تحوش

ان زبنت ازبن على اللي خويه ما يهاش
وان عنزت اعنز على اللي عن ادخيله يهوش

وان حداك القيض ياذيب لا ترد المشاش
اردلك عد0،) كما قيل بالجمه جهوش

والحبال البايده ما تورد والخياش
ما تحفض الماء ولو زينوها بالنقوش

وان جلست اجلس مع اللي مافي قلبه غشاش
لا تجالس واحد(ن) دايم بهرجه لطوش

ولا تمازح واحد(ن) فيه خفه وارتباش
تبتلش به غصب وتضيع في ليلاً دهوش

وانتبه لا تحطب الشوك الاعكف والقشاش
يمزع اثيابك ويملى يدينك بالمخوش

وابتعد عن شجرة (ن) داخل (ن) فيها غواش
تاجد الحياة فيها مسوية(ن) عشوش


تعليقات الزوار

  • كُل المحتوي و التعليقات المنشورة تعبر عن رأي كتّابها ولا تعبر بالضرورة عن رأي موقع الشعر.
  • بعض صور الشعراء و الشاعرات غير صحيحة، نرجو تبليغنا إن واجهت هذى المشكلة
  • إدارة موقع الشعر لا تتابع التعليقات المنشورة او تقوم بالرد عليها إلى نادراً.
  • لتواصل مع ادارة موقع الشعر إضغط هنا.
© 2020 - موقع الشعر