الحال ما هو حال

جفّت عروق الانتظار وتيّبس
شوفه تقل عوشز تكسر غصونه

والحال ماهو حال والحظْ تنكّس
حتى بريق الردّ ما لاح لونه

يا مطلبي شيّدت فالرّوع مجلس
يحرم على كلّ الخلايق يرونه

ما عاش مخلوقٍ عليه يتلسلس
وانته حلالك من ثراه لمزونه

وش حيلة اللي كلّ ماالليل عسعس
قاموا شياطين الهواجس يجونه

مابين حرق الجمر وفكرٍ موسوس
يالله تنزع من خفوقي ضنونه

في كلّ ليله جاب همّه وروّس
لين الصبح ما فارقتني لحونه

ياهيه قل وش ذنب منهو تلبّس
عشقك على روعه وغطى متونه

واللي عطاه الزين وعيون نعّس
ترجف ضلوعي والحنايا يبونه