الحال يالغالي مثل ما انت شايف

ياصاحبي لا عاد تنشد عن الحال
الحال يالغالي مثل مانت شايف

مغبون غبن وْماتت بقلبي امال
وْياما عليك بداخلي من حسايف

الى طرى طاريك لحظه على البال
يْهل دمعي فوق خدي ذرايف

تدري وانا ادري ما ورى البعد ميصال
وْلا عاد من بعد التفرق نكايف

لكن خذ قولي على كل الاقوال
علمٍ يخلّد في وجيه الصحايف

ما فيه ذل اشد من ذل الابطال
وْلا فراقٍ اقسى من فراق الولايف

وْلا اسوى من الدمعه على خد رجال
لا شاف فالدنيا القهر والكلايف

دْموع الرجال تْزلزل الكون زلزال
وتهدّ شامخة الجبال النوايف

وانا من اسبابك تحمّلت الاهول
وبعد الشجاعه صرت بالحيل خايف

ابكي على ذيك المنازل الاطلال
وابكي غرامك ياحسين الوصايف

وتبغى الكلام اللي بلا شك وجدال
من صادق الاحساس ما هوْ بزايف

بعدك ولو خسارتي روس الاموال
ما ني على الدنيا كثير الحسايف