سماوي مع لئيم ...! - صالح بن عمار

من يقول اني سماوي مع لئيم.
بشّروه الفكر ولّع في غيومه.

الصواعق بالشواهق والهشيم.
تحت رجلين المذله طول يومه.

القوافي عينها بعين الفهيم.
علّم الجاهل يفتّش في علومه.

والحقيقه لو تبيها بالصميم.
قلتها والروح بالمعنى جزومه.

اللئيم اللي يتقلب مع ذميم.
في ثنايا الليل منزوعه هدومه.

شمعته.! بالليل طفاها النسيم.
يوم قلبه باع باللذات نومه.

لو تغسّل بين زمزم والحطيم.
ماتطّهر والنجاسه في كمومه.

حالفٍ برسل حياته للجحيم.
تحرق القيفان قلبه مع سمومه.

بومةٍ بين الصقور اللي تهيم.
في مجره كل حرفٍ لي ترومه.

الصقور تحوم والبومه سقيم.
بينهم والله مدري وش لزومه.

لو يهدونه ترى فعله عديم.
بومةٍ لو طار ولو ماطار بومه.

لو جلبته قالوا العالم غشيم.
مايباع ولالقيت اللي يسومه.

بحره الميت اشاره للفهيم.
جاهلٍ كل القيم فيه معدومه.

© 2024 - موقع الشعر