زوايا الحبر ...!

وشوشة ناس ٍ وربي لي معين.
في زوايا الحبر.! وجه افكارها.

نكره بْعيني..! سببها لو يبين.
حذفها بالهرج ... وسط اديارها.

مايمررها ..! وانا رجل ٍ ذهين.
في سما صدري .. رصد رادارها.

آتغابى له .! لجل وضعه يزين.
والهدف .! له حبة ٍ وعيارها.

نيته ماهي بوحده ....! نيتين.
والسوالف ...! فكها مضمارها.

يا ثعل لو تدخل بْظلمة عرين.
السلامه .! وجهها باسرارها.

لا تسوط الهرج بلسان ٍ متين.
وتملحه ....! بصغارها وكبارها.

علموا الخباز بالخبزه عجين.
بطنها .....! ماذاق لسعة نارها.

ياعيون ٍ للحقيقه وش تبين.
الخوافي مابغيت اظهارها.

بحسبه من ظمن ناس ٍ ميتين.
في قبور ٍ .....! الردى حفارها.

ويا بحور ٍ عن يساري واليمين.
كل محاره ..... لها بحّارها.

وموقف الطيب على قلبي ثمين.!
له غلا العينين والاّ جارها.

لو يلين طويق .. قافي مايلين.
شامخ ٍ يطرب على مزمارها.

من مناشيها رفيف ٍ له يقين.
بالغيوم .! اللي تطول اعمارها.

ارعدت ثم ابرقت عبر السنين.
واكشفت عن وجهها بانوارها.

امطرت من صدر ينضح بالمعين.
خالها الضامي.! وعس امطارها.

تشرح الخاطر وتسرح بالوتين.
الهجوس اللي تسوق اخبارها.

ضيفنا...(مايرجع بْخفي حنين).
الشحم بكبارها وصغارها.

والضيافه بنّها.! بْركن ٍ ركين.
ضيفها.! يطرب على مشوارها.

طبخة ٍ حاضى لها قلب ٍ وعين.
ريحها ..! مرسالها لزوارها.

تطبخ بجوفي ...! لها قلبي ظمين.
دلة ٍ ....! ناداك ريح بْهارها.